Thursday, March 14, 2013

Fwd : ဘဝတစ်ဆစ်ချိုးနဲ့ စိတ်ဓာတ်အင်အား

                  ဒီကနေ့ခေတ်မှာ အလုပ်အကိုင်အခွင့်အလမ်းတွေ ပိုမိုများပြားလာသလို စိမ်ခေါ်မှုတွေကလည်း ပိုလာပါတယ်... ဈေးကွက်မှာ ပြိုင်ဆိုင်မှုတွေများလာတော့ ဝန်ဆောင်မှုဦးစားပေးတဲ့ အခြေအနေမျိုး တဖြည်းဖြည်းဖြစ်လာတယ်... အဲ့ဒီတော့ လူသားရင်းအမြစ်ကအရေးကြီးလာပါတယ်... တကယ်အရည်အချင်းရှိတဲ့.. တကယ်ကျွမ်းကျင်တဲ့.. တကယ်အားကိုးအားထားပြုနိုင်တဲ့ သူမျိုးကိုပဲ လုပ်ငန်းရှင်တွေက ခန့်ထားချင်ကြပါတယ်... ကိုယ်တိုင်စွန့်ဦးတီထွင်လုပ်ငန်းမျိုးလုပ်မယ်ဆိုရင်လည်း... ယှဉ်ပြိုင်ရင်ဆိုင်ရမယ့်သူတွေက အများကြီးရှိနေမှာပါပဲ... အဲ့တော့ ကိုယ့်ဘဝလမ်းကြောင်းတစ်ခုပေါ်မှာ ခိုင်ခိုင်မာမာရပ်တည်နိုင်ဖို့ဆိုရင် တော်ရုံအရည်အချင်းနဲ့မရတော့ပါဘူး...
ဘွဲ့ရပညာတတ်လူငယ် အများစုကတော့ ခေတ်ရေစီးကြောင်းနဲ့လိုက်ပြီး ယိမ်းထိုးနေကြပါတယ်... ကိုယ့်လမ်းကြောင်းပေါ်ကိုယ် အခိုင်အမာရပ်တည်နေတဲ့ လူရည်ချွန်လူငယ်တွေလည်း ရှိကြပါတယ်... ဒါပေမဲ့ အနည်းစုပါပဲ... ကျန်တဲ့အများစုထဲက အတော်များများကတော့ မိဘဆွေမျိုးတွေရဲ့ လောင်းရိပ်အောက်မှာမိနေကြတုန်းပါပဲ... ၉ တန်း ၁၀ တန်းမှာ ဖိအားပေးထားသလောက် ရလာတဲ့အမှတ်ပေါ်မှာမူတည်ပြီး သူတို့ဖြစ်စေချင်တဲ့အတိုင်း လုပ်ခိုင်းကြတော့တာပါပဲ.. ကိုယ့်ကလေးက ဘာကိုစိတ်ဝင်စားတယ်.. ဘာကိုဝါသနာပါတယ်ဆိုတာကို မစဉ်းစား.. မဖော်ထုတ်... ကိုယ်ဖြစ်စေချင်တဲ့အတိုင်း အတင်းရိုက်သွင်းကြပါတယ်... ဒီလိုဘဝရဲ့ ပထမတစ်ဆစ်ချိုးမှာတော့ ကိုယ့်ဆုံးဖြတ်ချက်နဲ့ကိုယ် ရွေးချယ်ရပ်တည်နိုင်ခဲ့တဲ့ လူငယ်တွေက အနည်းစုပဲရှိပါတယ်... တကယ့်တကယ်နစ်နာရတာကတော့ လူငယ်များတွေပဲဖြစ်ပါတယ်...
ကျောင်းပြီးတဲ့အခါမှာလည်း ကိုယ်တကယ်စိတ်မဝင်စားတဲ့ ဘွဲ့တစ်ခုရလာတော့ အဲ့ဒါနဲ့ ပတ်သက်ပြီး ဆက်လေ့လာဖို့ အဲ့ဒီပညာနဲ့ အသက်မွေးဝမ်းကျောင်းပြုဖို့ မစဉ်းစားကြတော့ပါဘူး... ဘဝကိုဘယ်လိုရပ်တည်မယ်ဆိုတဲ့ ရည်ရွယ်ချက်လည်းခိုင်ခိုင်မာမာမရှိကြပါဘူး... သူများစာရင်းကိုင်ဆို လိုက်ကိုင်လိုက်တာပဲ... သူများအင်္ဂလိပ်စကားပြောဆို လိုက်ပြောလိုက်... သူများ အော်တိုကတ်ဆို လိုက်ကတ်လိုက်... သူများနိုင်ငံခြားဆို လိုက်ခြားလိုက်ပြန်တာပါပဲ..... ဘာနဲ့ အသက်မွေးဝမ်းကျောင်းပြုမယ် .. ဘယ်လမ်းကိုရွေးချယ်မယ်လို့လည်း ဆုံးဖြတ်နိုင်ခြင်းမရှိကြပါဘူး.... မိဘအသိုင်းအဝိုင်းရဲ့ လိုလားချက်တွေ ကလည်း မလွန်ဆန်နိုင်ကြပါဘူး... လုပ်ငန်းခွင်ထဲရောက်သွားတာတောင် ယုံကြည်မှုရှိရှိမလုပ်နိုင်မကိုင်နိုင်ဖြစ်နေတဲ့သူတွေရှိနေပါသေးတယ်... ဘာကြောင့်လဲဆိုတော့ ကိုယ်ဝါသနာပါတဲ့ ကိုယ်ကျွမ်းကျင်တဲ့ အလုပ်ကို မလုပ်ရလို့ပါပဲ... စာသင်ကျောင်းကနေ လုပ်ငန်းခွင်ကို ကူးပြောင်းတဲ့ ဒီလိုအချိန်ဟာ ဘဝရဲ့ ဒုတိယတစ်ဆစ်ချိုးပါပဲ... ဒီအချိန်မှာ ကိုယ့်ရွေးချယ်မှု မှန်ရင်မှန်သလို ကိုယ့်ကြိုးစားအားထုတ်မှုကောင်းရင်ကောင်းသလို ဘဝတစ်လျှောက်လုံး အကျိုးခံစားရနိုင်ပါတယ်...
ဒီနေ့ခေတ်မှာ အသက်မွေးဝမ်းကျောင်းလုပ်ငန်းတွေကလည်း စုံလင်များပြားလှပါတယ်.. ကိုယ်ဝါသနာပါတာကို မျက်နှာငယ်စရာမလိုဘဲ တိုးတက်အောင်ကြိုးစားယူနိုင်ပါတယ်... ဆရာဝန်ဖြစ်မှ အင်ဂျင်နီယာဖြစ်မှ ရှေ့နေကြီးဖြစ်မှဆိုတဲ့ခေတ်က ကျန်ခဲ့ပါပြီ... ကိုယ့်အခွင့်အလမ်းကို ကိုယ့်ဘာသာဖန်တီးယူနိုင်တဲ့ ခေတ်ကိုရောက်နေပြီဖြစ်ပါတယ်... နောက်ပိုင်းဆိုရင် ဒီထက်မက အခွင့်အလမ်းတွေ.. အခြေအနေတွေ ကောင်းလာဖို့ပဲရှိပါတယ်... ဒီလိုအခြေအနေမှာ တွေဝေမိန်းမောနေလို့ မဖြစ်တော့ပါဘူး... ပတ်ဝန်းကျင်ရဲ့ လောင်းရိပ်အောက်ကနေ ရုန်းထွက်ပြီး ကိုယ့်ဘဝ ကိုယ်ပုံဖော်ကာ လျှောက်လှမ်းရမှာပဲဖြစ်ပါတယ်... ကိုယ်ဝါသနာမပါဘဲ တက်ခဲ့ရတဲ့ ပညာရေးကတော့ နှမျောစရာကောင်းပါတယ်... ဒါကိုပဲ ဖက်တွယ်ဆုပ်ကိုင်ထားရင်လည်း ဘဝတစ်လျှောက်လုံးတိုးတက်မှုနဲ့ အလှမ်းဝေးသွားပါလိမ့်မယ်... အရေးကြီးတာကတော့ ကောက်ရိုးမီးမဖြစ်ဘဲ တစိုက်မတ်မတ်လုပ်သွားဖို့ပဲလိုတာပါ...
ပထမဆုံး ကိုယ်ဘာဝါသနာပါတယ်ဆိုတာကို သိအောင်ကြိုးစားရပါမယ်... ကိုယ်ဝါသနာပါတဲ့အချက်ဟာ ကိုယ့်ဘဝရပ်တည်မှုကို ဘယ်လိုအထောက်အကူပြုနိုင်တယ်ဆိုတာကိုလည်း သုံးသပ်ဖော်ထုတ်ရပါမယ်... ကိုယ်ဝါသနာပါတဲ့အလုပ်ကို သိမယ်... အဲ့ဒီအလုပ်ကလည်း ကိုယ့်ဘဝတိုးတက်ရေးအတွက် အမှန်တကယ် အထောက်အကူဖြစ်နိုင်မယ်ဆိုရင် တစိုက်မတ်မတ်လေ့လာလုပ်ကိုင်ဖို့လိုပါတယ်.. ကိုယ်ဝါသနာပါတဲ့ အလုပ်ကိုလုပ်ကိုင်နေရတယ်ဆိုရင် အလုပ်လုပ်ရတာကို ပင်ပန်းတယ်လို့မမြင်တော့ပါဘူး... အလုပ်လုပ်ရာမှာပျော်လာပါမယ်... တကယ်ဝါသနာပါတဲ့ အလုပ်ဖြစ်တဲ့အတွက် တိုးတက်ရာ တိုးတက်ကြောင်းကိုလည်း ကြိုးစားလုပ်ကိုင်ဖြစ်မှာသေချာပါတယ်... ဒီလိုမလျှော့သောလုံ့လနဲ့ ကြိုးစား လုပ်ဆောင်မယ်ဆိုရင် ဘဝတစ်ဆစ်ချိုးအချိန်ကနေစပြီး.. ကိုယ့်ဘဝလမ်းကြောင်း တစ်လျှောက် အောင်အောင်မြင်မြင်လျှောက်လှမ်းနိုင်မှာ သေချာပါတယ်...
-----------------------------------------------------------
နှိုင်းရင့်နွေမှ ရေးသားသည်...
https://www.facebook.com/hnaingyintnway

No comments:

Post a Comment

Related Posts Plugin for WordPress, Blogger...